Dr Wegger lütet, s tönt dur s ganz Hus.
Als erschts göhn die beiden Augetörli uf.
Oh je, das seht jo ganz nach Alltag us.
Isch das mit em Kaländer nur e Bluff?
Nänei myn Schatz s isch Wirkligkeit.
Das het dr Santiklaus mir gsait.
Gseht s au wie dr Alltag us.
Und au e so als wär s e Grus.
S isch e so, es zeigt druf hi.
S wird alles wieder schöner sy.
Wenn d Tage wieder häller wärde.
Dä Kaländer tuet uf die Täg hi wärbe.
Drum freu di druf.
E Schtärn goht uf.
S ka alls nur besser wärde.

Juhui jetzt isch scho s 2. Türli dra.
Was wird s hüt ächt dinne ha?
Oh wie schön e Wiehnachtsschtärn.
Das lüchtend rot han i so gärn.
Rot bringt rassigi Farb ins Läbe.
Erfreut au s Härz und d Seel drnäbe.
Rot isch d Liebi pur.
E Prachtsfarb vo'r Natur.

S 3. Türli öffnet sich hüt
Drin het s 3 Schtügg
Traumhafti hübschi Ängeli
Das sin wirklig keini Bängeli
Sie sin so süess und nätt
Dass me sie gärn immer by sich hätt
Für di singe sie wunderschön
Mit klarschte hälle Tön
E herrlig Liebeslied
Wo au um die ganzi Wält zieht

Am e Tag wo so schtürmisch isch
Brucht jede Härzenswärmi
Drum lueg was hinter däm Türli isch
Für so ne Gschänk do schwärm i
D Liebi isch e königlich Guet
Wo bis in kleinschte Zeche herrlich guet tuet

Hesch s Türli ufgmacht
Erläbsch die Pracht
Vo dr Gedankewält
Die brucht kei Gäld
Sie fliegt ganz frei
Ganz ohni Blei
Wie ne Ballon
Är kunnt zu dir
Kunnt au zu mir
Är fliegt dir zue
Losst oft kei Rueh
Är zieht verby
Ka luschtig sy
Brucht au kei Lohn

Gschwind mach s 6. Türli uf
Ou do landisch grad im Puff
6 zum Vergnüege
Isch au so ne Sach
Wär sich dry ka füege
Erläbt kei Ungemach
Hesch Freud erläbt
Läbe entschtoht
Viellycht het s gfägt
Viellycht gsehsch nochhär rot
Sogar unseri Muetter Ärde
Het könne dur s Liecht befruchtet wärde

Hinter em 7. Türli in dr Adväntswand
Findsch e ganz e Huffe Sand
S git e Bild mit nur einere Schpur
Dr Wanderer frogt Gott
Wo bisch Du nur
Losch mi ganz elei
So kumm i nümme Hei
Do sait dä Gott
I ha di trait
Wo het dr Schturmwind gweiht
Drum bau dy Burg im Sand
Und lueg vertrauensvoll dur d 'Wand'

Gib 8
Uf s Törli 8
Denn was d au hesch gm 8
Äs haltet W 8
Haltet in Sch 8
Het drum e gwüssi M 8
Vom Morge bis in d N 8
Über alls was me het gm 8 

Hinterem Türli mit em Nüni
Findsch e ganz feins Znüni
Es soll dir bis ins Härze guet tue
Oder au vom Kopf bis zu de Schueh
D Liebi goht bekanntlig dur dr Mage
Drum müen mir nit verzage
Mir hän jo alls im Überfluss
Drum plogt is au gar kei Verdruss
Mr könne täglig dankschön sage
Dass mr d Liebi hän und e gfüllte Mage

He nei au lueg au do
Das Türli het wieder en 1 biko
En 1 und e Nüt hindedra
Me luegt das für e 10i a
S fangt also wieder vo vorne a
Drum wünsch i dir au nonemol
En Adväntszyt wundervoll
Mit viele glügglige Momänt
Wo au e Langzytwirkig händ
E Glanz und e Liechtersäge
Soll dy Umgäbig präge
Sodass s um di ume heiter isch
Obwohl d no im dunkle Winter bisch

Hinter em Türli 11 akurat
Schtoht dr Popeye scho parat
Het im Sagg e Büxs Schpinat
Die verleiht au dir d Kraft
Wenn di fühlsch erschlafft
Schwups hesch alles gschafft
Und bruchsch no öpis zum Lache
Kasch das ganz eifach mache
Und scho sehsch was d mit Schpinat alls kasch mache
(www.youtube.com/watch?v=X28werKJ4rk)

S 12. Türli wartet scho
I hoff du heigsch s nit zfrüeh ufto
Über s 12i will i e Lied dir singe
Und so die Zahl zum klinge bringe
"Hört ihr Herrn und lasst euch sagen
Unsere Glock hat 12 geschlagen
12 das ist das Ziel der Zeit
Mensch bedenk die Ewigkeit"
(Text: Erk Böhme 18.Jh. Lied: www.zeit.de/kultur/musik/2010-02/wiegenlieder-folge-14)
D Natur het is d Linner Linde gschänkt
I ha als Symbol für s 12i an sie dänkt
Sie isch e Troscht und zeigt
E keinschte Bligg in d Ewigkeit
Sie zeigt au d Zyt, wo kunnt und goht
Und wie me d Zyt letschtlig überschtohtoht
(Winter- oder Steinlinde  /  über 500 Jahre alt, 11m Umfang, 25 m hoch)

Lueg emol das Bildli a
Kasch eifach dyni Freud dra ha
Obwohl am Türli isch s 13 dra
Sin die Blueme nit wunderbar
Filigran und häll und klar
D Sunne hän sie voll ygfange
Uf Wasser lang müesse blange
1 Tropf drvo
Und s Wunder het sy Afang gno
Soviel Blueme hän d Kraft biko
Ihri Blüete waxe zlo
1 Tag schtöhn sie prächtig do
Und scho het dr Tod sie gno
Gläbt hän sie e rych Läbe
Nit im Beschträbe
Glügglig zwärde
Nur im Sy
Sin sie ganz drby
Bilde e gschlossene Blüetekranz
Und alles erstrahlt in herrlichem Glanz
Verleitet Insekte zum glügglige Tanz

Do luegsch s Fänschter mit em 14i a
S het e blaue Rahme dra
Und luegt eim au so fründlig a
Grad sy Schlichtheit zieht eim a
Was het das Hus wohl für e Türli dra
Isch ächt e läsbari Nummere dra
So Türli und Fänschter verbinde mi und di
...
Wieder emol e guete Wunsch vo mir
E frohi Adväntszyt wünsch i dir

Hüt kasch scho s 15. Türli ufmache
S isch högschti Zyt zum Gutzi bache
Vo jetzt a kasch au anderscht zelle
Fascht wie by 'azellebölleschelle'
S goht nur no 9 Täg
Denn isch d Sunne wieder zwäg
Und sie legt sich nüm nieder
Sondern sie kunnt wieder
Und d Täg könne länger wärde
Uf dere schöne Ärde
Doch jetzt no in dr dunkle Zyt
Isch dr Obe bald sowyt
Drum schigg i dir e lichte Ängel
Är het au gar kei Mängel
Är soll erfreue dy Härz
Soll au lindere dy Schmärz
Damit wirsch seelisch zwäg
Erklimmsch uf dym Läbeswäg
Au dr högschti Bärg
Ganz munter und froh
Soll s au im nägschte Johr wyter go

Hinter em 16. Türli findsch
überraschend e Tier
Bringt di das in Clinsch
Nei das isch kei Gschmier
Lueg au gnau a dyni Hand
Viellycht sehsch au dä Elifant
Wo dur alli Gfohre trait
Wenn au dr heftigscht Wind entgege weiht
Jä alli syni Attribut
Hälfe dir und wärsch au blutt
Wenn de nümme wyter weisch
Au nüm weisch
Was d saisch
Das zwüsse isch tröschtlig
Die Idee au köschtlig
Pagg di mit dr eigne Hand am Schopf
Zieh di sälber us em Sumpf
Denn bisch nüm en arme Tropf
Het au dy Kleid mänge Rumpf
Oh wie schon in sich zha so ne Elifant
Wo immer hilft mit Härz und Hand

So jetzt kumm i ändlig drzue
S 17. Advänts-Türli ufztue
Grossi Schtürm ziehn verby
Wohltuendi Schtilli setzt y
Jedes Ungmach goht verby
E gwüssi Leeri tritt y
Drususe ka Neus entschtoh
S Härz und d Seel wärde froh
Scho 4 Kerzli erstrahle hüt am Kranz
Ihri Flämnli vollfüehre e heitere Tanz

Machsch hüt s Türli 18 uf
Isch nur e Mondsicheli druf
Und s Müsli het s erfasst
S Liecht mit beide Pfote gfasst
Jetzt lüchtet s in Konkurränz zum Mond
Wo by uns e Maa dinne wohnt
Im Land näbedra
Luegt is e Frau vo onenabe a
Jedem isch s wohl 'au Claire de la Lune'
Egal ob Frau oder Ma tuet obenabe schyne
Im Liecht hän alli Platz
S isch au jedem sy gröschte Schatz

Das sin e paarmol 19 Wintersunne
Wo d hüt bym Türli öffne hesch gwunne
S isch immer wieder zum schtuune
Wie Blueme verbreite gueti Luune
Wie d Gfühl schpräche sie im Härz öpis a
Sodass d eifach kasch Freud dra ha
D Blueme halte mir nur fiecht
Aber sie trinke eher s Liecht
Und schtrahle s wieder us
Nur mir gsehn, s isch e Grus
Im Alltag ganz oft grimmig us
Als lauf is über d Läbere e Lus
Worum sin mr ächt so gyzig mit Lache
Mr könnte jo au e fründligi Miene mache
Wie schtrahlti denne d Wält
Sodass s die ganzi Dunkelheit erhällt

Im Flug vergoht die Zyt
und d Wiehnacht isch nüm wyt
S 20. Türli hesch scho offe
Gäll, das macht di au betroffe
Wie im Schturmwind fliege d Gedanke
Sie bringe uns oft gnue zum wanke
Isch öpis guet oder isch es schlächt
Was isch falsch und was isch rächt
S hilft is nit wyter numme zklage
Mir müen nit zaudere nit verzage
Wie s hässlige Äntli irre mr oft dur d Wält
Jage dr Annerkennig noch und em Gäld
Aber unser Härz möcht is zur Syte schtoh
Is hälfe und sage, wo mr sölle dure go
Denn unser Innerschts het e guete Plan
Dur dä musere mr is zum e schöne Schwan

Kum hesch s Türli 21 ufto
Ghörsch die Schlümpf do
Dir e luschtig Liedli singe
Herrligi Tön in dym Ohr erklinge
Singe macht froh
Trällere und Jodle ebeso
Drum loss täglig dyni Schtimm erklinge
Drmit kasch dir gueti Gfühl erringe
Bisch emol schlapp und krank
Findsch mit summe wieder dr Rank
Aber au mit pfyfe oder schreie
Kasch Freud und Arger usdrugg verleihe
Drum find täglig dyn eigne Ton
Und gueti Luune isch dyn Lohn

S Türli 22 hesch jetzt offe
Und mit em Bildli ins Schwarze troffe
Lueg emol die Gsichter a
Wo me im Alltag finde ka
Jä au unseri eigeni Miene
Keini tuet is heiter erschyne
Jede glaubt es gäb nüt zlache
Öpis müesst me anderscht mache
Und dr inner Clown go sueche
Ferie vom Griesgram bueche
Humor isch wenn me trotzdäm lacht
So wie s dä Clown do macht
Denn hän mr e Sünneli in dr Hand
Und e fröhlich lüchtends Gwand
Denn überschtöhn mr liecht die längschti Nacht
Wyl dr Narr in syner Eifalt drüber lacht  

So Heinzelmännli wäre allwä e Gschänk
Wenn i an die viele Arbete dänk
Wo täglig müen erledigt wärde
E grossi Hilf wäre do scho so Zwärge
Drum findsch so Hälfer hinterem Türli vo hüt
Die schaffe für di was de wit
Was ? Das kasch nit glaube
Zviel Arbet ka dir dr Schlof raube
I sag dr Eins probier s Mol us
Denn hesch Erfahrig und kunnsch drus
Gang alli Arbete ganz ruehig a
Fang an irgend eme Egge a
Dörfsch di nit schtresse lo
Denn sunscht ka d Zyt nit blybe schtoh
Und die Hälfer nit vüre ko
Doch blybsch in Rueh und schtetig dra
Kasch d Hilf vo viele Hälfer ha
Probier s us und freu di dra
Denn fangt e neu Zytalter a

Jetzt luegsch s letschte Türli a
Wo ne Adväntskaländer ka ha
I hoff de hesch Freud dra gha
Und wenn d no meh möchtsch ha
Fangsch eifach mit läse wieder vo vorne a
D Täg wärde wieder länger
Obwohl dr Winter no schtränger
Drum isch s Liecht gebore
Und in dr kalte Nacht fascht erfrore
S wärmt und erfreut wirklig jedes Härz
Linderet Kummer und Schmärz
Wyl s Läbe isch und bringt
Was Liebi bedingt
Denn wärte tuet niemols d Sunne
Au s Läbe het no immer gwunne
S erschtoht alles immer wieder neu
Drum au di dä Tag erfreu
Dy eiges Läbe
Eiges Beschträbe
Zügt au vom Liecht tief in dir
Juhui wie schön: läbe mir

E Ziel seh und s erreiche welle
Bis s sowyt isch, d Schtunde zelle
Kämpfe und alles gä drfür
Ysatz zeige, das öffnet d Tür
Und de bisch erfreut am Ziel
Das git dr bis ganz zInnerscht viel